Sot festohet Dita e Alfabetit të Gjuhës Shqipe, që përkujton Kongresin historik të Manastirit, mbajtur nga data 14 deri më 22 nëntor 1908. Kjo ngjarje shënoi njërën nga arritjet më të mëdha të kombit shqiptar – unifikimin e alfabetit të gjuhës shqipe mbi bazën e shkronjave latine.
Në Kongres morën pjesë 50 delegatë nga të gjitha trojet shqiptare, përfaqësues të shoqërive kulturore dhe arsimore të kohës, si dhe figura të shquara patriotike e fetare. Debatet e gjata dhe përpjekjet për të gjetur një gjuhë të përbashkët shkrimi përfunduan me miratimin e alfabetit latin, duke hedhur një hap të rëndësishëm drejt konsolidimit të identitetit kombëtar.
Ky vendim i vitit 1908 u kthye në një pikë kthese historike, pasi mundësoi përhapjen e arsimit në gjuhën amtare dhe forcoi lidhjet midis shqiptarëve të ndarë në provinca të ndryshme nën Perandorinë Osmane.
Kongresi i Manastirit nuk ishte vetëm një akt gjuhësor, por edhe një deklaratë kombëtare që tregoi vullnetin e shqiptarëve për bashkim dhe përparim. Ai i parapriu shpalljes së Pavarësisë së Shqipërisë vetëm katër vjet më vonë, në 1912.
Në këtë 115-vjetor, në qytete të ndryshme të vendit po organizohen aktivitete përkujtimore, ekspozita dhe orë letrare që nderojnë figurat e Kongresit dhe rëndësinë e gjuhës shqipe si shtyllë e identitetit kombëtar.
