SHBA i kërkon Serbisë të tërheqë trupat ushtarake përgjatë kufirit me Kosovën
Koordinatori për komunikime strategjike në Këshillin e Sigurisë Kombëtare të SHBA-së, John Kirby i ka kërkuar Serbisë së tërheqë trupat ushtarake në kufi të Kosovës.
Duke ndarë shqetësimin e Uashingtonit gjatë një bisede me gazetarët, ai tha se do të monitorojnë dislokimin e madh serb përgjatë kufirit me Kosovën.
“Ne do të monitorojmë dislokimin e madh serb përgjatë kufirit me Kosovën. Ne i bëjmë thirrje Serbisë të tërheqë forcat nga kufiri dhe të vazhdojë të ulë tensionet”, tha Kirby.
Ndërsa pasi u pyet nëse ky grumbullim i trupave ushtarake pranë kufirit është sinjal se Serbia po përgatitet për ndonjë pushtim ushtarak, ai tha se për momentin situata po vëzhgohet.
“Po e shikojmë, po e vëzhgojmë. Por, qëllimin e grumbullimit të trupave ushtarake serbe, nuk mund ta them tani”, tha ai.
