Ndërron jetë aktori Guljelm Radoja, ishte prekur nga koronavirusi

05/05 11:36
Credits to Apollon TV
Ndërron jetë aktori Guljelm Radoja, ishte prekur nga koronavirusi

Aktori i njohur shqiptar, Guljelm Radoja, “Artist i Merituar”, është ndarë nga jeta në moshën 75-vjeçare pasi ishte prekur nga koronavirusi. Prej ditësh, Radoja ishte i shtruar në spitalin “Shefqet Ndroqi”, aty ku ndërroi jetë mëngjesin e sotëm.

Lajmi është konfirmuar edhe nga djali i tij Red Radoja, me anë të një postimi në Facebook. “Pushofsh në paqe bab! Do ndrijnë akoma sytë e tu mbi ballin e vajzës, djalit, mbesave dhe nipit të vogël”.

Guljelm Radoja ka lindur më 2 korrik të vitit 1945 në qytetin e Shkodrës. Pas përfundimit të studimeve të larta në Institutin e Lartë të Arteve (sot Akademia e Arteve) për Dramaturgji në vitin 1972, fillon punën si aktor profesionist në Teatrin e Librazhdit. Më pas largohet nga ky teatër për të punuar si aktor dhe regjisor pranë Teatrit “Bylis” të qytetit të Fierit dhe më pas si aktor në Teatrin “Aleksandër Mojsiu”, në Durrës. Ndër interpretimet e tij në teatër mund të përmendim rolet e tij në dramat “Bourgeois Wedding” e Bertold Brehtit, “Me syrin e një klouni” e Heinrich Bwllit, “Trojanët” e Vasilis Theodoropulosit etj.

Në kinematografi, ai ka luajtur më shumë se 30 role. Roli i tij i parë ishte ai i inxhinierit të pyjeve në filmin “Gjurma” në vitin 1970. Më tej, do të vazhdonin një sërë rolesh të tjera si roli i Tenente Gurabardhit në filmin “Në fillim te verës” në vitin 1975, roli i Stefan Bardhit në filmin “Mësonjëtorja” në vitin 1979, roli i Petro Nini Luarasit në filmin “Kush vdes në këmbë” në vitin 1984, roli i priftit në filmin “Kthimi i ushtrisë së vdekur” në vitin 1989, roli i prokurorit në filmin “Kolonel Bunker” në vitin 1998, etj.

Guljelm Radoja është nderuar me titullin “Artist i Merituar”.

Shpërndaje

© 2021 APOLLON TV. All Rights Reserved.