Foto të trishta që flasin shumë. Ndërkohë që kolegët e tyre vijojnë punën, këta zjarrfikës kanë gjetur pak momente për të marrë frymë, pas orëve intensive të punës gjatë këtyre dy ditëve. 

Është një tragjedi kjo që ka ndodhur dhe ende po ndodh në bodrumin e qendrës tregtare “Casa Italia” në Tiranë. Brenda ende nuk janë shuar të gjitha vatrat e zjarrit ndërsa shefi i rojeve Arjan Sala nuk përgjigjet në telefon që në momentin që ka rënë zjarri. Dyshohet se ka ngecur brenda magazinës së përfshirë nga flakët dhe nga asfiksimi e më pas nga zjarri i madh mund të ketë ndërruar jetë. 

Kanë kaluar 50 orë që nga momenti i flakëve dhe 33-vjeçari në fillim ndihmoi kolegët e tij të shpëtonin gjallë, por vetë nuk mundi të dalë më prej aty. Zjarrfikësit kanë bërë çmos që në fillim, por ende nuk kanë mundur që të shuajnë të gjithë zjarrin pasi ka shumë vatra dhe materialet që po digjen janë plastike dhe “të djegshme”, që do të thotë se e mbajnë zjarrin për një kohë të gjatë. Brenda në magazinë temperatura ka shkuar deri në 1000 gradë celcius.

Familjarët e pikëlluar mezi presin të marrin lajme nga djali i tyre, që deri më tani nuk po gjendet.