LUSHNJE/ Kthen banesen ne laborator droge, arrestohen 3 kultivuesit

01/04 8:14
Credits to Apollon TV


Tre persona nga Lushnja janë arrestuar sëfundmi, pasi janë kapur në flagrancë, teksa kishin përshtatur shtëpinë e tyre si një serë për kultivimin e kanabisit. Pamje që i kemi parë vetëm nga shiptarët në Angli, janë parë edhe sot në Lushnje.

Policia njofton se ka zbuluar brenda një banese, një ambient të përshtatur si laborator, që shërbente për kultivimin e bimëve narkotike, nëpërmjet ngrohjes me llamba. Gjatë operacionit janë sekuestruar fidanë kanabisi, pajisje të ndryshme elektrike dhe një armë gjahu. Ndërkohë një shtetas tjetër është shpallur në kërkim. Kujtojmë se në shtëpitë e barit punojnë shumë shqiptarë në Angli. Ato janë edhe arsyeja e largimit të shumë të rinjve nga Shqipëria.

Lushnjë

Goditet një rast i tentativës për kultivim të bimëve narkotike.

Finalizohet me sukses nga Komisariati i Policisë Lushnjë, operacioni antikanabis i koduar “Laboratori”.

Policia zbulon brenda një banese, një ambient të përshtatur si laborator, që shërbente për kultivimin e bimëve narkotike, nëpërmjet ngrohjes me llamba.

Sekuestrohen fidanë kanabisi, pajisje të ndryshme elektrike dhe një armë gjahu.

Bien në pranga 3 shtetas, shpallet në kërkim 1 tjetër.

Nga shërbimet e Komisariatit të Policisë Lushnjë, në vijim të kontrolleve të pandërprera dhe punës për parandalimin e kultivimit të bimëve narkotike, pas informacioneve të marra më parë në rrugë policore, u bë i mundur finalizimi me sukses i operacionit antikanabis të koduar “Laboratori”.

Gjatë operacionit u bë arrestimi në flagrancë i shtetasve:

F. D., 53 vjeç, banues në Dushk, Lushnjë.
K. I., 30 vjeç, banues në Lushnjë.
K. L., 38 vjeç, banues në Lushnjë.

Gjithashtu është shpallur në kërkim shtetasi K. K., 31 vjeç, banues në Fiershegan, Lushnjë.

Këta shtetas, në bashkëpunim me njëri-tjetrin, kishin përshtatur katin e parë dhe katin e tretë të banesës së 53-vjeçarit F. D., me aparatura që shërbejnë për kultivimin e bimëve narkotike.

Gjatë kontrollit të banesës u gjetën 170 fidanë të dyshuar narkotikë kanabis, të kultivuar në kushte laboratorike, të cilët u sekuestruan në cilësinë e provës materiale.

Në këtë banesë është konstatuar një lidhje e paligjshme e energjisë elektrike, e cila shërbente për furnizimin me energji të pajisjeve si llamba, aspirator, filtra ajrimi etj, që ndihmonin në kultivimin dhe rritjen e bimëve narkotike.

Gjithashtu, në cilësinë e provës materiale u sekuestruan të gjitha pajisjet që kanë shërbyer për kultivimin e bimëve narkotike, si: pajisje elektrike, llamba elektrike termale, bidonë me lëndë ushqyese për bimët narkotike, kapikorta (pajisje me të cilat ishte bërë lidhja e paligjshme e energjisë elektrike).

Gjatë operacionit, në banesën e shtetasit F. D. është gjetur dhe sekuestruar dhe një armë gjahu pa leje.

Materialet për veprime të mëtejshme i kaluan Prokurorisë pranë Gjykatës së Shkallës së Parë Lushnjë, për veprat penale “Kultivimi i bimëve narkotike”, “Prodhimi dhe mbajtja pa leje e armëve të gjuetisë dhe sportive” dhe “Vjedhja e energjisë elektrike”.

Shpërndaje

© 2021 APOLLON TV. All Rights Reserved.