“Jam vetë babai i një djali të vogël, e marr me mend zemrën e babait të Klodianit”, Veliaj: Reagimi i qytetarëve i kuptueshëm, pemët dhe dritat rraqe janë

10/12 14:58
Credits to Apollon TV
“Jam vetë babai i një djali të vogël, e marr me mend zemrën e babait të Klodianit”, Veliaj: Reagimi i qytetarëve i kuptueshëm, pemët dhe dritat rraqe janë

Kryetari i Bashkisë së Tiranës, Erion Veliaj ka komentuar ngjarjen e rëndë që ndodhi mëngjesin e të martës, ku punonjës të Policisë së Shtetit qëlluan mbi 25-vjeçarin Klodian Rasha. Veliaj shprehet se autori duhet të mbajë përgjegjësi, ndërkohë që e quajti të kuptueshëm reagimin e qytetarëve në protestën e djeshme.

“Unë jam babai i një djali të vogël dhe e marr me mend si i është thyer zemra babait të Klodit sepse nuk besoj se ka gjë më të rëndë sesa të humbësh fëmijën. Një ditë do kesh vetë fëmijë (i drejtohet banorit të shtëpisë së re) dhe do e kuptosh çfarë dhimbjeje është kur të sëmuret, e jo më ta humbasësh. Ajo familje është zemërthyer dhe ka gjithë të drejtën e botës të jetë e mërzitur, këtë s’e luan topi.

Që kanë merak për drejtësi, edhe kjo kuptohet. Imagjino sa gjëra kanë ndodhur në këtë shtet dhe nuk kanë parë drejtësi. Ndaj, ata kanë të gjithë të drejtën e zotit të mërziten, si edhe ata që prishin dhe dëmtojnë qytetin – rraqe janë, nuk është ndonjë hata, do i rikuperojmë prapë. Jeta do të vazhdojë!”, u shpreh Veliaj.

Veliaj bën thirrje për drejtësi, teksa heq dhe një paralelizëm me ngjarjen e 21 Janarit.

“Ka edhe një lloj mirëkuptimi kur e shfryn mërzinë, por duhet bërë drejtësi, nuk duhet lënë si 21 Janari, që shteti të vriste dhe pastaj bëheshin heronj. Ai që ka bërë gabimin duhet të mbajë përgjegjësi. Ka të drejtë familja që është zemërthyer, e mirëkuptoj totalisht. Ka të drejtë edhe një pjesë e qytetarëve, se jo të gjithë janë të dhunshëm. Një pjesë e qytetarëve thjesht kanë një revoltë dhe thonë kjo nuk duhet të ndodhë, nuk ka arsye për t’i marrë jetën dikujt.

Kurse ajo minoranca që shkatërron, nuk përben problem, do i rregullojmë prapë. Por, në këtë fazë duhet të inkurajohet drejtësia që t’i shkojë deri në fund kësaj pune. Të zbardhë rrethanat dhe të vendoset një standard i ri, që këtu nuk ndodh gjë pa u ndëshkuar. Pastaj, për të pastruar e rregulluar, pemë e drita, punë e madhe, rraqe janë. U prish shtëpia nga tërmeti, e ribëmë prapë më të fortë, shtëpia e vjetër ishte cope-copë. Për t’u ringritur do të ringrihemi, e vetmja çështje është që të ringrihemi më të mirë se ç’ishim kur ramë”, përfundoi Veliaj.

Shpërndaje

© 2021 APOLLON TV. All Rights Reserved.