Gara për kreun e PD, Edith Harxhi zyrtarizon kandidaturën: Do të reformoj partinë mbi idealet e vitit 1990-91

21/05 15:51
Credits to Apollon TV
Gara për kreun e PD, Edith Harxhi zyrtarizon kandidaturën: Do të reformoj partinë mbi idealet e vitit 1990-91

Edith Harxhi, nga “Grupimi për PD”, është zyrtarisht rivalja e dytë e Lulzim Bashës për postin e kryetarit të Partisë Demokratike, në zgjedhjet që do të zhvillohen më 13 qershor.

Zonja Harxhi është përfaqësuesja kryesore e grupimit ku bëjnë pjesë edhe ish-presidenti Bujar Nishani, dhe figura të tjera të PD-së, si Arben Imami.

“Duhet të jetë një garë e hapur, transparente dhe e barabartë. Deri tani nuk është një garë e tillë. Shpresojmë shumë që PD-ja të rikthehet në vlerat që ka pasur, të konkurrencës së barabartë dhe të transparencës”, tha zonja Harxhi. “Ky është një moment mjaft i vështirë për Shqipërinë, pas humbjes së zgjedhjeve të 25 prillit. Dhe mendojmë që ajo që ofroj unë dhe ne si grup është një reformim i thellë i PD-së mbi idealet e vitit 1990-91, PD ka nevojë për një fillim të ri sa më parë”.

Grupi në fjalë ka zhvilluar një mbledhje gjatë paradites, ku me sa duket është vendosur edhe zgjedhja e zonjës Harxhi si kandidate. Në të njëjtin grup bën pjesë edhe Ibsen Elezi, ish-kryetar i PD-së në Kukës, i cili flitet se gjithashtu mund të kandidojë.

Më parë gjatë ditës, edhe Fatbardh Kadilli zyrtarizoi kandidimin e tij kundër Bashës.

 

Shpërndaje

© 2021 APOLLON TV. All Rights Reserved.